Col 1 | JAE | STEP | Kilisi Jesu nê aposolo aê, Paulu, taŋ Anôtô kêkalem aê naŋ, agêc lasic Timote

Colossians 1

Paulu awa gêjac lau Koloso

1 Kilisi Jesu nê aposolo aê, Paulu, taŋ Anôtô kêkalem aê naŋ, agêc lasic Timote 2 ma biŋ êndêŋ Anôtônê lau to ma lasitêwai, taŋ sêkêŋ gêwiŋ Kilisi sêŋgôŋ Koloso naŋ. Tameŋi Anôtô nê moasiŋ to biŋmalô êndêŋ amac êwac.

Paulu gêjam daŋge Anôtô

3 Aêac ateŋ ma mec gêdêŋ aêacnêŋ Apômtau Jesu Kilisi Tama Anôtô ma ajam daŋge kêtu amacŋa ŋapaŋ. 4 Aêac aŋô amac akêŋ gêwiŋ Kilisi Jesu to têmtac gêwiŋ Anôtônê lau samob ŋawae. 5 Amac akêŋ gêwiŋ to têmtac gêwiŋ ŋam kêsêp gêŋ, taŋ akêŋ matem gêc undambê naŋ. Anôtô kêmasaŋ gêŋ tau kêtu amacŋa. Gêŋ taŋ amac akêŋ matem naŋ, ŋawae tec aŋô su gêdêŋ taŋ biŋŋanô gêô lasê amac. Biŋŋanô tau ŋawae ŋajam. 6 Ŋawae ŋajam gêdêŋ amac gêwac ma gêjam ŋanô to kesewec aŋga amacnêm kêtôm gêgôm e gêjam nom samucgeŋ auc, gêjac m gêdêŋ bêc, taŋ amac aŋô to ajala Anôtônê moasiŋ tobiŋŋanôgeŋ naŋ. 7 Aêacnêŋ koleŋwaga Epapra, taŋ têntac gêwiŋ eŋ naŋ, kêdôŋ biŋ tonaŋ gêdêŋ amac. Ŋac tau kêtu Kilisinê sakiŋwaga ŋaŋêŋ gêjô aêac su. 8 Eŋ gêjac miŋ gêdêŋ aêac gebe Ŋalau Dabuŋ kêkêŋ amac akêŋ nêm têmtac gêwiŋ gelom tau ŋanô.

9 Kêtu tonaŋŋa gêdêŋ bêc, taŋ aêac aŋô biŋ tonaŋ kêpi amac naŋ, aêac ajac m to ateŋ ma mec kêtu amacŋa gedeŋ tôŋge . Aêac ateŋ Anôtô gebe amac ajala ênê biŋ êtu tôŋ e ênam amac auc ma ênê Ŋalau êkêŋ kauc mêtêŋa to kauc êkip ŋam saŋa samob êndêŋ amac. 10 Go atôm gebe asa nêm lêŋ e êwa amac sa gebe Apômtaunê lau amac, ma eŋ êlic ênac mataanô ŋajam. Anam koleŋ ŋajam tokaiŋ-tokaiŋ e atap ŋanô sa ma nêm kauc ajala Anôtôŋa esewec aŋga amacnêm. 11 Ŋaclai taŋ ŋam kêsêp ênê ŋajaŋa toŋawasi naŋ, êpuc amac tôŋ gebe aôc gêŋwapac totêmtac êpê sugeŋ ma êôŋ ŋaŋêŋgeŋ. 12 Ma anam daŋge totêmtac ŋajamgeŋ êndêŋ Tameŋi, taŋ gêjac dabiŋ amac su gebe awê kaiŋ Anôtônê launêŋ gêŋlênsêm aŋga gamêŋ ŋawêŋa awiŋ. 13 Eŋ gêjam aêac sa aŋga ŋaclai ŋakesecŋa ma ketoc aêac daŋgôŋ ênê Latu, taŋ têtac gêwiŋ eŋ naŋ, nê gamêŋ. 14 Ŋac tau tonaŋ kêgaboac aêac su ma kêsuc aêacnêŋ sec ôkwi.

Biŋ kêpi Kilisi to nê koleŋ

15 Ŋac tonaŋ gêjam Anôtô, taŋ talic eŋ atom naŋ laŋô. Eŋ kêtu gêŋ samob, taŋ Anôtô kêkêŋ naŋ ŋaŋacsêga, 16 gebe Anôtô kêkêŋ gêŋ samob, taŋ gêc undambê to nom naŋ, ŋa eŋgeŋ, gêŋ taŋ mateŋanô talic to gêŋ, taŋ talic sapu naŋ, amboac gôliŋ to apômtaui ma ŋasêga to ŋaclai. Anôtô kêkêŋ gêŋ samob ŋa eŋgeŋ ma kêtu eŋŋa. 17 Gêŋ samob tonaŋ ŋai masigeŋ, eŋ taugeŋ gêmoa gêmuŋ ma gêbiŋ gêŋ samob tôŋ kêpi tageŋ. 18 Eŋ kêtu ôli ŋamôkêapac. Ma eŋ ôli tau gôlôac dabuŋ. Eŋ kêtu gêŋ samob ŋam. Eŋ kêtu lau, taŋ sêndi sa aŋga ŋacmatênêŋ naŋ, nêŋ ŋacsêga, gebe eŋ tau êtu gêŋ samob ŋaŋamata. 19 Amboac tonaŋ Anôtô gêlic ŋajam gebe nê ŋanô ênam Latu auc samucgeŋ. 20 Anôtô kêkêŋ eŋ gê wama gêŋ samob gêdêŋ tau. Eŋ kêkêŋ Latu kêkêc nê dec siŋ aŋga kakesotau, tec kêkêŋ biŋmalô gêdêŋ gêŋ samob, taŋ sêmoa nom to undambê naŋ.

21 Amac tec gêmuŋgeŋ amoa jaêc Anôtô. Ma biŋ, taŋ taêm gêjam to ŋakoleŋ sec, taŋ ajam naŋ, gêgôm amac atu ênê ŋacjo. 22 Mago galoc Kilisi gêmac êndu, tec gê wama amac gêdêŋ Anôtô. Eŋ gebe êmansaŋ amac atu dabuŋ ma akô Anôtô laŋônêm tolaŋômnêm sawa ma tobiŋ masigeŋ. 23 Tec akêŋ êwiŋ to apuc taôm tôŋ akô ŋajaŋa. Gêŋ teŋ êkac amac su aŋga ŋawae ŋajam, taŋ aŋô to akêŋ matem amoa naŋ atom. Sêjam mêtê ŋamalac samob, taŋ sêmoa umboŋ ŋalatu naŋ, ma aê, Paulu tauc, tec katu ŋawae ŋajam tau ŋasakiŋwaga.

Paulu gêjam sakiŋ gôlôac dabuŋ

24 Ma galoc gaôc ŋoc gêŋwapac totêtac ŋajamgeŋ kêtu amacŋa. Ŋandaŋ ŋagêdô, taŋ kêtap Kilisi sa atom, gacgeŋ gêc naŋ, janac dabi ŋ êpi tauc ôlic, jajô Kilisi su êtu eŋ ôliŋa. Ma eŋ ôli tau gôlôac dabuŋ. 25 Aê katu gôlôac dabuŋ nêŋ sakiŋwaga ma Anôtô kêkêŋ kôm tonec gêdêŋ aê gebe jawa ênê biŋ sa tomalageŋ êndêŋ amac. 26 Gêdêŋ andaŋgeŋ biŋ tau tonaŋ kêsiŋ tau gêdêŋ ŋamalac samob gêc lêlômgeŋ. Mago galoc kêtu awê gêdêŋ Anôtônê lau. 27 Anôtô gebe êwa sa êndêŋ nê lau gebe biŋ toŋawasi tolêlôm-tolêlôm, taŋ kêsiŋ tau gêc lêlômgeŋ naŋ, jakêtu awê gêdêŋ lau samuc. Biŋ ŋalêlômŋa tau tonec gebe Kilisi gêmoa gêwiŋ amac, tec akêŋ matem ênê ŋawasi. 28 Amboac tonaŋ aêac asôm mêtê lasê ma alêŋ biŋ ŋamalac samob to adôŋ kauc mêtêŋa gêdêŋ ŋamalac samob, gebe anac dabiŋ ŋamalac samob sêkô Anôtô laŋônêm ma Kilisi êmbiŋ êsêac tôŋ, 29 tec gajam koleŋ to gajac siŋ kêtôm Kilisinê ŋaclai, taŋ gêjam kôm ŋajaŋa aŋga ŋoc ŋalêlôm naŋ.